Bitxiloreak eta Mitxoletak taldeak ariko dira nor baino nor, pilotan eta bertsotan
ZESTOA – Igande honetan, ekainaren 8an, jokatuko da Etxeko Memoriala Bertso Pilota Txapelketaren finala Zestoako kiroldegiko frontoian. 12:00etan hasiko da ekitaldia, eta bi partida jokatuko dira: bat lau eta erdian eta bestea binaka. Finalera Bitxiloreak eta Mitxoletak taldeak iritsi dira, eta txapelaren bila arituko dira esku pilota eta bertsolaritza uztartzen dituen lehiaketa berezi honetan.
Bitxiloreak taldea Naroa Agirrek, Leire Galdeanok, Iera Iturriagak eta Sebastian Lizasok osatzen dute. Mitxoletak taldean, berriz, Leire Oskoz, Amaia Arrastia, Ainhoa Ruiz de Infante eta Anjel Mari Peñagarikano lehiatuko dira.
Txapelketa hau Ados emakume pilotari profesionalen elkarteak antolatu du, eta sei jardunaldi jokatu dituzte finala iritsi aurretik: Itziarren, Donamarian, Berriozarren, Lazkaon, Sunbillan eta Urdazubin. Lehiaketak Naroa Elizalde pilotariaren memoria gorde eta omendu nahi izan du jardunaldi guztietan zehar.
Guztira hamabi pilotari eta lau bertsolari aritu dira norgehiagokan, lauko taldeetan banatuta. Esku pilota eta bertsolaritza uztartzen dituen egitasmo honek emakumezko pilotarien lana balioan jartzeaz gain, euskal kulturaren bi adierazpide handi uztartzen ditu ikuspegi berritzaile eta herrikoi batetik.
Finala Zestoako kiroldegiko frontoian izango da, igandean 12:00etan.