Barrokal-Mendiburuk San Fermin Torneoko binakako txapela jantzi dute Labriten

Barrokal-Mendiburuk nagusitasunez irabazi dute finala, Oskoz-Orbegozo bikoteari 22-8 gailenduta.
San Fermin Torneoak amaiera bikaina izan du gaur Iruñeko Labrit pilotalekuan, binakako final handiarekin. Jaialdia giro ederrean jokatu da, eta zaleek emakumeen pilota profesionalaz gozatzeko aukera izan dute berriro ere San Fermin testuinguruan.


Lehen partidan, Iturriaga-Agirre eta Aranburu-Arrastia bikoteak aritu dira aurrez aurre. Txapela jokoan ez bazegoen ere, partida polita eskaini dute, pilota ondo mugituz eta tanto ikusgarriak utziz. Norgehiagokak giroa berotzeko balio izan du final handiaren aurretik.
Ondoren iritsi da San Fermin Torneoko binakako finala. Oskoz-Orbegozo eta Barrokal-Mendiburu bikoteak izan dira aurrez aurre, baina finalak hasieratik izan du norabide argia. Barrokal-Mendiburuk oso sendo ekin diote partidari, erritmoa ezarri dute eta markagailuan azkar hartu dute aldea.


Oskoz-Orbegozo saiatu dira partidaren dinamika aldatzen, baina ez dute lortu aurkarien nagusitasuna haustea. Barrokal-Mendiburuk partida oso serioa jokatu dute: indartsu kantxan, ondo kokatuta eta tantoak pazientziaz landuz. Aukera izan duten bakoitzean eraginkortasunez amaitu dute, eta finala hasieratik euren eremura eramatea lortu dute.


Azkenean, 22-8 nagusitu dira Barrokal-Mendiburu, eta San Fermin Torneoko binakako txapela jantzi dute Labriten. Garaipenak bikotearen sendotasuna eta txapelketan zehar erakutsitako maila berretsi ditu.
Sari-banaketan izan dira Maider Beloki, Iruñeko Udaleko zinegotzia; Itxaso Soto, Nafarroako Gobernuko ordezkari gisa; eta Rafa Gorria, Iruñeko peñen ordezkari gisa. Haien presentziak berriro erakutsi du torneoak Iruñeko jai giroarekin eta erakundeekin duen lotura.


Ados Pilotak eskerrak eman nahi dizkie Labritera gerturatu diren zaleei, parte hartu duten pilotari guztiei, Iruñeko peñei, babesleei eta, bereziki, Iruñeko Udalari eta Reyno Gourmeti, San Fermin Torneoa posible egiteagatik.
Aurtengo edizioak berriro erakutsi du emakumeen pilota profesionalak baduela lekua San Fermin giroan, eta Labrit pilotalekua plaza berezia dela halako hitzorduetarako.